Татар балалары туган телне мәктәптә генә саклап кала.

Бу хакта Удмуртиянең Балезино районы Паюра авылы мәктәбе директоры Альбина Касимова «Татар-информ»га белдерде. Бүген Паюра авылына Бөтендөнья татар конгрессының «Ак калфак» татар хатын-кызлар оешмасы вәкилләре килде. Очрашуның максаты — татар милли традицияләрен саклау эшендә тәҗрибә уртаклашу.

Бу авылда да җирле «Ак калфак» оешмасы бар. Паюра — Балезино районының зурлыгы ягыннан икенче урында торган татар авылы. Биредә 9 сыйныфка кадәр төп белем бирә торган мәктәп эшли. «Мәктәптә 48 укучы исәпләнә, балалар бакчасына 32 бала йөри. Төрле милләт балалары бар, күпчелеге — татарлар», — дип ачыклык кертте мәктәп директоры.
Мәктәптә татар теле һәм әдәбияты дәресләре укытыла. «Кызганычка, татар телендә сөйләшүчеләр кими. Сүз дә юк гаиләдә милли мәдәният һәм традицияләр саклана. Əмма туган тел онытыла, гаиләдә дә русча аралашуга күчәләр. Бүген мәктәп кенә туган телне саклап калырга ярдәм итә ала», — диде Альбина Касимова.
Паюра мәктәбе узган ел татар телен, мәдәниятен саклау максатыннан интерактив музей оештырган. Бу проекны Татарстан Хөкүмәте гранты отып тормышка ашырган.

Фото: Лилия Гаделшина

 Бу хакта тулырак: https://tatar-inform.tatar/news/2018/12/06/176533/

Комментарий

  1. Элбәттә шулай. Мәктәптә татар телен бетерсәләр, татар халкы 20-30 елда юкка чыгачак. Өйдә дә телебезне сакларга кирәк, әмма өйдәге белем генә милләтне сакларга җитми, Татар теленең нечкәлекләрен, грамматикасын мәктәп кенә бирә, шуңа күрә мәктәпләрдә татар теле дәресләрен саклагыз!!!


Комментарий язарга